材料：牛油20克+豬油20克+雞蛋二隻+低筋面粉110克+黑糖80克 另外乾酵母一細茶匙+梳打粉一粒黃豆咁啲啲份量
（因為酵母如果落得太多，或者發酵時間過長，就會產生酸味，而梳打粉為純緘性，緘可以中和酸味，因為依款馬拉糕需要稍長時間去發酵，所以需要落少少小梳打粉去令到製作出嚟嘅馬拉糕不致產生過多嘅酸味而影響個味道）
基本上依個食譜係無落水架，如果覺得太結，可以加多一個雞蛋或者少少牛奶去開個粉漿，因為我用既蛋係大隻啲，所以蛋同油已經足夠開到個粉漿。
另外，后嚟我因為唔想食得太油膩，所以我在依個食譜嘅基礎上，又再減少佐油既份量，而增加佐雞蛋既數量，咁食落無咁肥膩。
依個隨個人喜好去定啦，基本上影響唔係好大，最緊要係發酵效果理想就最主要。
傳統食譜上係用豬油或者雞油一類動物性油脂，添加唔同嘅油，出嚟嘅味道有好大分別，不過現代家庭，依類動物性油脂嘅獲取基本不容易，所以捨其難取其易，大家於家中製作，可以直接全數用哂牛油，無問題嘅。
出自連結
作法：1，將豬油同牛油隔水蒸融化（微波爐亦可）
睇下，一碗仔油。就係因為有佐依二種混合油，令到個點心更香更滑
2，將所有材料撈勻即可，係咪超簡單咧~~~
（麵粉與黑糖最好用個篩過一過再攪拌，可以令粉漿更為均勻無起粒，並且乾酵母可以先用暖水開佐佢，最後再撈入粉漿度，以確保酵母菌總存活可以使用。）
舊時嘅人，會每次留起適量嘅發酵佐嘅粉漿，做酵種，用酵種整出嚟嘅馬拉糕，多佐一份淡淡嘅酒香味，非常怡人，不過小家庭製作，好耐先整一次，咁樣留起糕種，就唔係好方便，所以都係退而求其次，乾酵母製作算了。
所有材料撈勻之后靜置最少二三個鐘等粉漿發酵，我試過擺入雪櫃一日一夜慢慢發酵，出嚟嘅效果總正，如果天氣熱，室溫下，二三個鐘基本上亦可以製作。
發酵完成嘅粉漿，可以見到明顯漲多好多，而且可以聞到酵母嘅味道，咁就可以繼續下一步。
3，容器入邊擦一層油，方便蒸好之后脫模
4，將粉漿倒入容器四分三滿，水滾之后擺入鑊度，蒸佐二十分鐘度，發得好靚~~~
咁樣，馬拉糕就整好啦~~~
係咪無想像中咁困難咧~~~
有凈少少嘅粉漿，另外搵個細嘅碟仔繼續蒸。
一個細細個餅仔咁，小朋友一定好鐘意~~~
撕開一半睇下，用乾酵母發酵而成嘅馬拉糕，好有彈性㗎~~~
而且用黑糖製作，果種天然嘅焦香味，加埋牛油豬油嘅香味，更加係無得頂~~~
沒有留言:
張貼留言