大日子的編排

除左一班兄弟姊妹擔任住重要角色之外, 當日仲有幾個重要角色要同大家分享

• 同酒樓經理 & 廚房大佬打聲招呼 + 派利是 : 因為一班姊妹去到酒樓就各有各忙, 咁兄弟們又唔太屬於懂得 social 形, 所以我將呢個重任交左俾姐夫

• 處理所有突發事情 : 交左俾家姐 & 姐夫, 話就話姊妹們可以幫我決定, 不過有 d o野我驚佢o地會顧慮太多, 所以同兄弟姊妹們講明, 如果有咩問題你o地解決唔到就直接搵我家姐/姐夫, 唔需要通知我/Kim Kim 老公 (免得影響心情ma)

• 臨時更改座位 : 原本 plan 左開 18 圍o既, 不過最後只係開左 16 圍, 因為有 d 人臨時 no show, 有 d 人當日先通知唔到.... 總之 n 咁多個原因啦... 好彩家姐幫我大執位, 否則就白白開多 2 圍...
  因為當日女家親戚居多, 所以呢個重任交俾家姐做就岩曬啦~~ 起碼家姐知道邊 d 人係一家人, 應該點安排座位, 雖然要 cut 2 圍o者, 但都唔可以亂安排賓客o家 ma~
  小小提示 : 最好搵一個熟識你o地o既親戚、朋友o既人。 有需要時, 應該男女家各一個負責人
  因為之前出席朋友婚宴時，佢交左呢個重任俾姊妹們，姊妹們將 d 親戚拆到散曬，搞到有不愉快結果

• 負責找數 : 原本諗住交俾哥哥o既, 因為哥哥個樣惡 d ,相信經理們都唔敢向佢亂搶
  但哥哥要幫手招呼賓客, 怕佢飲得太多 (雖然佢好少飲醉), 但當日真係好難講o家, 一陣又紅酒, 一陣又烈酒, 一陣又啤酒, 所以安全起見, 都係交俾姐夫啦 (所以姐夫當晚飲左好少酒 ja , 辛苦曬你啦!~)
  小小提示 : 唔好搵一個太心軟o既人，因為有 d 酒樓真係會不停 chur 你俾多 d tips o家
  亦最好搵一個有經驗o既人，起碼可以比較一下你婚宴是好是壞，再決定俾幾多 tips

• 負責 reception 收禮金 : 媽咪幫我搵左 2 個表姐 負責 (因為媽咪始終覺得自己人安心 d), Kim Kim 老公就安排左佢家姐 & 妹妹幫手, 不過同時佢o地都要周圍招呼佢o地 d 親戚朋友, 所以主要都係靠 2 個表姐
  搵親人都有好處o家, 因為如果安排兄弟姊妹們的話, 佢o地未必識你 d 親戚朋友, 下下都要問人o地係邊個, 再慢慢搵佢o地應該坐邊  仲有個好處, 就係親戚賓客黎到唔洗 on 居居, 起碼有人識, 仲可以吹陣水先~
  咁你可能會話, 咁親戚唔識你 d 朋友, 都 care 唔到你 d 朋友~
  但朋友係年青人, 自己睇 sitting plan 都唔係大問題 ar ma~